我的收藏
版主
申請
開區
申請
nemo
加入日期:2008-4-29
流動積分:2196
查看 43980 回覆 212
按讚 0 按彈 0

婚禮詳盡計劃書 由準備到BD當日 所有細節(原創)

2009-4-15 16:57:36
  • 結婚係人生大事,好既一生人一次就夠,因為會好煩,好煩
    我剛剛搞掂我既婚禮,藉此將今次經驗話俾大家知,俾大家有準備及知道現時既行情及需面對的問題,我會逐點同大家分析,分享我既經驗:


    你要絕對清楚明白,結婚根本就係一個SHOW,係做SHOW俾人睇
    根據自己(你地兩人)既意願,可以大搞,細搞,唔搞都得,唔一定結婚要搞婚禮,簡單到可以請兩家人食飯就算,都可以叫婚禮。都係睇你地兩人想點。

    儲錢
    儲錢結婚係第一步準備,咁儲幾多呀??有冇賺呀??
    以現時2008年計,準備一個普通婚禮預算係15萬~20萬不等,要視乎酒席圍數及各項化妝和用品價錢高低而定。
    早在十多年前,結婚可以賺,我相信。但到現時結婚話可以賺的,大多都是不可能,拉平已經好叻,莫講話賺(如果你的朋友親戚賀禮個個都係1000元或以上就另當別論)。

    婚莎相
    如果你有留意,現時好興旅行影婚莎相,又可預支渡蜜月,又靚,要選擇好既影樓,除左朋友事後介紹外,自己親自格價,走多兩間有你著數。有名氣貴小小既得確物有所值。我係珠海MXXXXX_CLASSICJOIN左個PLAN….8XXX(埋單過萬係正常)
    珠澳兩地影,景又好,自己有得選,化妝及衫都OK,出黎效果滿意。
    婚莎相幾時影??
    通常越早影越好,係婚禮前1~2年影或更早都可以。俾時間D錢回氣及時間自己KEEPD個樣。
    你亦可以選個好日子/值得記念既日子(我地選情人節)

    擇日子
    如果其中一方係傳統中國人,就一定會搵師傅擇日行禮,冇咩特別需要,只係傳統禮儀,擺酒日子,過大禮時間,男女上頭時間,出門時間,回門時間….等等。

    人數統計
    係訂酒席前,統計一下男女家人,親戚朋友同事既人數,預計圍數。好多時預定人數會頭痛,應該請同唔應該請既人,我當時以最簡單原則,小聯絡既唔請,唔記得請就算。親戚朋友,現時重有聯絡的同事朋友就需要請。可能會令到自己煩既就免得請。
    可能有人係HK或內地有親戚,人數總計在1圍以下,。可以請佢過黎飲(通常好重要,好好朋友,好好關係就會黎飲),人數在1圍或以上,建議直接上門去佢地到請佢地食飯算喇,因為你隨時要包佢食住行。
    我都係係內地擺左幾圍請佢食飯就算,都不知幾開心。雖然花多小小錢但無咁辛苦自己。
    最好可以在統計人數時,即時將佢地編排好晒位置,避免到時亂坐。派貼個時將位置寫係封背(台號)。

    酒席
    擇左日子,有埋人數,即係擺酒日子不遠了,搵酒樓就一定要格價,菜單,包咩,唔包咩。
    通常都係搵星期5、星期6及星期日,但同時亦很難搵到合心水日子。因全年好日唔係時時有,亦唔係只得你地結婚,所以一擇好日就即時ACTION搵酒樓,問下朋友邊到好,自己又走去睇下。
    留意以下幾點:
    圍數夠唔夠擺?個場點呀?食物方面點呀?菜單貴唔貴呀?每圍酒水係咪包晒?有冇酒店房送呀?小食包唔包呀?自己帶酒要唔要開樽費呀?有冇基本布置呀?個布置大約點樣?有冇車呀?多左圍數有冇第日食呀?可以加減幾多圍?等等
    如果以上問題都解決晒恭喜..你可以落訂喇。
    提醒一下你:酒席如果搵到熟人幫就最好搵佢幫,因為可能會送多D野同埋價錢可以平D
    我當時搵人幫手,酒席7折外,酒水全包任飲,免開樽費,最後埋單重要係開幾多圍計幾多圍。足足平左幾萬。

    特別留意
    酒席找數通常不會用現金
    以信用卡找數。可儲積分,另外冇人會帶十多萬出街。BD1~2月問銀行加大信用額,隔天才找數,通常可以。當天只需帶2~3萬就可以。

    酒席圍數
    圍數可以分3次通知酒店。可預計最準既圍數
    你落訂個時,係俾個大約圍數
    到落實印貼個時又俾一個數,因為印貼個時都剛好係中間位時間,人數一定有變
    係正式派貼(重有個多星期),最後確實圍數
    可以同酒樓傾,咁大家都有著數


    通常訂完酒席後一年就係擺酒既日子,咁中間要做得事就多囉,除左搏命搵錢外,就係要….

    0 0

    評分

    1

    查看全部評分

  • nemo 2009-4-15 16:57:54
    推薦

    搵兄弟姐妹
    一定要搵D真係幫到係手,幫唔到手唔好搵,因為你當晚只係影相都會好唔得閒,兄弟姐妹係幫你地手,包括兄弟幫手玩新娘時幫手,頂酒,唔夠一圍時幫手坐滿一圍,迎賓幫手,招乎客人,玩遊戲,搞氣氛,做MC等等。
    另搵一男一女或最信任既人(家人亦可),應付可能出現既問題,叫其餘兄弟姐妹做野及負責收禮金及禮物(禮物最好有記錄及集中存放)
    唔好睇小兄弟姐妹幫手既能力,佢可以令你輕鬆一半。
    而且要提前通知佢地安排假期幫手

    印貼
    唔需要請幾多就印幾多,因為親戚方面有一張貼幾個人黎,所以我係以親戚總數既6~7成計算,加朋友同事總數,加預多30張左右,就係所需印貼數。

    餅卡
    通常都係聖安那,馬利奧,美心等最常用….買餅卡最好買半打裝,有時一打裝未必一次食得晒,半打剛剛好。餅卡預多冇問題,因限期有好多年,而且送禮自用都goodfit,通常聖安那係3、6、9、12月都有折扣,到時買重抵。

    酒水預備
    如果酒席已包汽水及水就不需去買…只需去買紅酒就可,唔需要貴,中下價錢就可以,大約30蚊一支已ok,數量視乎飲酒人數而定,一圍一支就正常,可以去批發中心買,又好飲又平。買貴酒冇著數,班野都係當水咁飲,而且可以叫佢當日送去。
    汽水去批發市場買,2.5蚊/罐 維他水2.5蚊/支 最平
    XO等烈酒1~2支可以,用黎撐場

    回禮
    現在有好多婚禮都好興有回禮,大大小小,咩類型都有,但同時都考起唔小心既心思,出面現時有好多現成,價錢由幾蚊到幾十蚊都有,都係不離筷子,蜜糖,糖等食得既野,你如有心思既。可自創:舊式紅雙喜火柴盒+糖….
    我地就選擇左雪糕,因對我地有特別意義,價錢同出黎效果都好好,婚禮當晚都有不錯既反應。

    花車
    可問酒樓借用,AVIS都有,最好可以問到朋友借,因租車好貴。

    兄弟車
    最理想係搵有車既兄弟,多小就睇下新郎想唔想威喇

    婚莎店
    現時好多婚莎店都有一條龍服務,包括場地布置,布置花車,兄弟車,兄弟姐妹花,花球,當晚攝影,租婚莎,音樂相冊,化妝等…..應有盡有,唔駛煩
    價錢越高所包既服務就越多,但以上項目基本都有
    場地布置:通常都係一個COPY式樣,好普通。如你有心思,可建議俾一個主題(THEME)出黎,例如主題係海洋、森林,天空等有一個方向,咁變化同效果都會好好。
    布置花車:通常有相俾你睇選。
    兄弟車:都只係搏花咁簡單
    姐妹花/花球:就不用多講,格多兩間買可能平D,花式都唔同
    攝影:錄影既師傅影響不大,攝影師係最重要一環,強烈建議大家搵多2個朋友,識玩單鏡反光機既去幫手影相,因曾經出現澳門某出名攝影師遺失客人百多張相的事件。所以建議大家搵多個攝影師冇壞,重要相可以兩個一齊影,平時可以一個跟主新人去影,另一個周圍同賓客影。
    租婚莎:最好JOIN PLAN,而且唔好單去一間租,去多兩間問都冇問題,因女人一生人最靚個個時間,梗係搵多件最靚既出黎見人喇。租既數量都係1件褂6件婚莎/晚禮服最GOOFFIT(行大運影相、酒樓影相x2、進場、敬酒、送客),多反而未必著得晒。男既就3~4件就可以。
    化妝:現時有得試妝當然最好喇,記住化左妝眼睇到既同影相出黎有好大分別,而點先知個師傅好唔好,每個人上唔上妝、接受度都唔同,未必人家介紹就一定好,最好既方法,搵同你化妝影相個師傅。我當時係珠澳兩地影,分別兩個唔同師傅,咁我就可以知道出黎既效果係點,再決定私下搵佢。如果唔想咁,唯有試妝,試多幾個師傅,試妝價錢都係$200~$300次。
    如果私下搵佢,價錢由$2000~$3000不等,還要留意包咩:新人幾多個妝,頭飾,包唔包埋姐妹,包唔包埋新人媽咪等,媽咪妝應該可以包個淡妝,姐妹就難D,通常唔會包,如果要化每位數百元。
    音樂相冊:早係5年前開始興起,進場前有段片,播放新人兒時的相片。如果自己識整或有朋友識。可以叫佢幫手。出面專人做一個需要千多元,而且你還需要準備相俾佢。時間需半個月左右。我當時係JOIN婚禮店個PLAN包埋,我除左提供相外,還有音樂及設計,佢只需幫我將佢地合併就可以。

    婚禮音樂
    一般酒樓用既音樂都好娘,可以自己準備音樂到時播放。我除左準備空檔時場內音樂外,還準備進場音樂、上菜音樂、敬酒音樂及送客音樂。(上網可以搵到)

    大襟姐
    現時出面請一個都幾貴,而且僧多粥少,要起碼一年前搵定。佢除左係兩家敬荼,知道一般習俗外,亦會包埋做MC(司儀)。
    我個人黎講,當時我冇請,而MC就搵朋友做,一樣可以。呢D都係睇下兩家人有冇人識基本禮儀,有人識既,建議可以唔駛搵。

    習俗方面
    如果有請大襟姐就唔駛煩咁多,佢會識。如冇,建議大家“識做既就做,唔識做既唔做,忘記左就唔做”最緊要係兩家人開心,方便自己。如果兩家親戚中,有位老佛爺(最有地位既長輩)〉亦可以問佢禮儀係點,如何安排。避免不必要的禮儀及統一些。

    利是:準備100元,50元及10或20元。100係俾兄弟姐妹及酒樓經理,50係俾酒樓部長等,10或20俾侍應及親戚。如何派往後會講。

    係BD前1~2個月,最好搵時間約晒兄弟姐妹出黎,分派工作(建議最好指明邊個負責),並準備一份計劃書,內容包括各事項的時間、車隊路線、兄弟姐妹名單及聯絡電話,開門利是等。

    去到呢到都七七八八,差唔多BD。

  • piglet115 2015-12-1 20:23:26
    推薦

    nemo 發表於 2015-9-3 20:14
    再推一推,時代唔同左,只供參考

    雖然樓主話時代唔同左, 但係真係絕對幫到好多人,  
    本人最近先入呢區爬文參考, 爬到呢篇咁詳盡的計劃書, 個心都定少少...
    因為絕大部分人都只係搞一次婚禮, 咩都唔識好徬徨,
    真係好多謝樓主的分享, 感激

  • nemo 2009-4-15 16:58:11
    3#

    一般係BD需做的事如下(以男家講):
    上頭(前一晚)
    一般都係1100~0100,叫幾位兄弟睇你上頭(大個仔),大約數分鐘,完成後派利是俾兄弟。女家一樣。

    (第二朝)
    如計劃好可按計劃進行
    車準備
    花車先去婚莎店化妝準備,完成後到男家,兄弟車一樣
    約晒兄弟係男家屋企食早餐,出車前派兄弟利是(100)及男家燒炮丈
    按已定路線行(提醒最好事前已通知所有人路線,避免走失)
    到女家,被玩(兄弟幫手),係女家敬茶,完成接新娘後行大運及返男家敬茶,建議男女家BD當日準備,大量紙巾,毛巾,風扇,凍飲,蛋糕(用餅卡),因為在女家玩完新郎,兄弟門都好攰,最好能準備一下,男家一樣。
    係男家敬茶後,可以外影相,

    回門
    影相後指派一名兄弟去酒樓攞一隻燒豬,一對新人返女家帶燒豬,之後帶返豬頭尾去男家(習俗,好頭好尾)

    返男家後就上半PART基本完成 時間一般係1200左右,兄弟姐妹新人可休息一下食飯。準備晚上。


    去到酒樓派利是方法如下
    經理:100
    廚房利是:大廚一封大既,另一封大既叫佢分俾幫手(廚房利是需另外包開)
    部長:50
    侍應:叫經理搵晒會服侍你的人即時逐個俾OR由經理講個侍應人數俾你,你數夠咁多封係其他部長面前交俾佢,要佢俾侍應。
    婚莎店人員應該在場布置,見到可以俾利是
    DJ房又可以俾,因為負責場音樂及VIDEO

    晚上基本都係幾PART好簡單
    影相
    進場
    敬酒
    送客
    呢幾PART好簡單

    但最好留意以下

    兄弟姐妹一定要幫手
    準備上台致詞
    男女家各找一人負責收集禮金禮物,登記
    做張LIST登記帶往酒樓的物品
    所有自己帶去的酒,酒樓一般都知,每支飲完需留吉樽,CHECK數,都提一提佢(紅酒及烈酒)
    如自己有提供任何物品或食品,需由酒樓方面幫忙,通知兄弟姐妹留意。
    一般酒樓都知,賓客另外點菜需經新人或主家人確定才可,都提一提酒樓
    指派1~2名兄弟姐妹親友,負責直接與酒樓聯絡,因新人當晚一定唔得閒。
    買兩條煙,拆開2包散晒,如一包包放好快冇,20~30副啤牌,出面街買一副$5左右,但酒樓一副可以$50,買多冇問題,簽名筆,小食,買花生,瓜子及用餅卡攞幾打蛋糕。
    差唔多完場個時....搵個兄弟有車之人,將負責KEEP住貴重物既人(手飾,禮金,禮物)車佢走先。
    所有兄弟姐妹必須與新人留待最後才走,幫手點算物品,搬野,車主婚人走等。

    去到呢到婚禮的事前準備都差唔多
    打左3日
    如有問題,敬請提出指出

  • 洛狄文 2009-4-15 18:08:54
    4#

    thx for sharing! ^^

  • ma9527 2009-4-15 18:40:17
    5#

    好詳盡呀!感謝你無私的分享。
    我有兩個問題:
    酒樓經理畀100利是夠唔夠?
    廚房未必畀普通人進入,交畀經理轉畀廚房?

  • Takya 2009-4-15 18:48:26
    6#

    Thanks, 幫您推推

  • ~水果糖~ 2009-4-15 19:20:09
    7#

    比利是的時候...係雙封定係單封架?

  • rurupigpig 2009-4-15 19:34:54
    8#

    thx for sharing...
    咁大廚即係俾幾多呀?

  • meltha 2009-4-15 19:52:51
    9#

    多謝你既分享呀~
    好正:shine: ~~多謝多謝

  • sandra218 2009-4-15 21:01:31
    10#

    多謝你既資料呀.....
    等我知道多d野.....我而家都好煩..好多野..都未搵,到....

  • MartinLeong 2009-4-16 00:32:39
    11#

    睇完你d資料後好多野都漏無做到呀~~真係要記低先,多謝你努力的分享,但很多人受用的呢.....

  • 女皇 2009-4-16 00:51:38
    12#

    真係無言感激呀! thanks !

  • nemo 2009-4-16 08:43:48
    13#

    原帖由 ma9527 於 2009-4-15 18:40 發表
    好詳盡呀!感謝你無私的分享。
    我有兩個問題:
    酒樓經理畀100利是夠唔夠?
    廚房未必畀普通人進入,交畀經理轉畀廚房?


    經理100夠喇...佢只係幫你打點下野...安排佢D手下幫你...差唔多喇

    廚房一定唔可以漏,上菜快唔快,好唔好食....差少少都會俾親戚唱就唔好喇
    你只要叫經理搵個大廚(廚房揸FIT人),之後俾佢就得喇
    當時我俾佢一千....D靚,幫廚就包一封500等佢自己分

  • nemo 2009-4-16 08:45:40
    14#

    原帖由 ~水果糖~ 於 2009-4-15 19:20 發表
    比利是的時候...係雙封定係單封架?


    係邊到俾個時

    上頭單封

    拜堂兩封

    酒樓單封

  • rurupigpig 2009-4-16 09:36:27
    15#

    多謝哂呀...

您需要登錄後才可以回帖 登錄 | 註冊

重要聲明:本網站討論區內容是以即時上載留言的方式運作,澳門流動社區對所有留言的真實性、完整性及立場等,不負任何法律責任。一切留言之言論只代表留言者個人意見,並非本網站之立場,用戶不應信賴內容,應自行判斷內容之真實性。由於本討論區受到「即時上載留言」運作方式所規限,故不能完全監察所有留言,若讀者發現有留言出現問題,請聯絡我們。澳門流動社區有權刪除任何留言及拒絕任何人士上載留言,同時亦有不刪除留言的權利。並遵守特區政府個人資料保護辦公室所公佈的「在互聯網上發佈個人資料的注意事項」.切勿撰寫粗言穢語、誹謗、渲染色情暴力或人身攻擊的內容,敬請自律。

小黑屋| Archiver| 澳門流動社區 CyberCTM.com

Powered by Discuz! © 2001-2013 Comsenz Inc.