我的收藏
版主
申請
開區
申請
Dusty
加入日期:2009-12-8
流動積分:1016
查看 6939 回覆 50
按讚 0 按彈 0

[遊記] 2010年檳城、浮羅交怡、怡保6日5夜歎美食之旅(超多相全卷完)

2010-9-29 20:44:45
  • 我們今次一行9個人,之前上亞航網頁買了香港直飛檳城來回機票($1100連稅),點知後來上網睇返價錢仲平左好多,真係蝕了......

    24-9-10:機場>Traders Hotel check in>penang road cendol +馳名珍多冰>極樂寺>亞依淡巴剎叻沙>小印度市區周圍行下>檳榔嶼>新關仔角嚐美食>紐冷街大排檔之地道美食晚餐>Traders Hotel Penang酒店

    25-9-19:酒店>碼頭搭船payar island>langkawi>gallery perdana前任首相馬迪醫生收藏館藏>
    老鷹廣場>美香露天海鲜晚餐>rebak island Resort

    26-9-10:酒店>魚排>孕婦島>红樹林喂鷹>釣魚>holiday villa check in>暹羅村午餐>水族館>langkawi cablecar山頂>市區行街>燈籠海鲜店晚餐>酒店

    27-9-10:酒店hea半日>午餐>機場飛檳城>royal酒店>怡保老黃芽菜雞>戲院街豆腐花>合香餅店>大發打捫柚>金寶麵包雞>檳城>青屋茶餐室宵夜>royal酒店

    28-9-10:酒店>第七街大排檔地道早餐>THE Northam酒店check in
    >
    義香餅家>成香餅家>亞依淡巴剎叻沙>鐘金泉荳蔻膏分行>北海甘文丁歎野生河鮮>坤泰餐廳晚餐>渡輪船睇夜景>酒店

    29-9-10:
    酒店>機場(6:00am)>回港


    http://www.shangri-la.com/en/property/penang/traders

    http://www.rebakmarina.com/rim_main.html

    http://www.hotelroyalpenang.com/

    http://www.northam-hotel.com.my/

    http://www.holidayvillahotellangkawi.com/


    [ 本帖最後由 Dusty 於 2010-10-31 21:33 編輯 ]

    0 0
  • Dusty 2010-9-29 20:45:06
    2#

    今早9點鐘就到達機場T2大樓,check in後聽到職員通知話班機提早了10分鐘起飛,真係嚇親死,還以為會遲飛添.

    好開心又可以同班為食朋友去旅行喇heehee


    由於亞航係無提供免費餐飲的,所以我們去了珍滿粥買早餐在機上食,我們統一買了牛肉粥配蝦米腸粉及豉油皇炒麵,由於有員工優惠,所以每個套餐係$26蚊,這價錢可接受啦.

    我們安排在前面第5行,不過無窗口位坐


    牛肉粥:個粥煲得好棉,味道唔錯

    蝦米腸粉:好厚粉,很麻麻

    豉油皇炒麵:見到都唔想食,炒好樣衰啊

    大概3個半小時就到達了檳城,我們之前訂好的車及導遊(Eric)亦準時在機場等候我們


    機場門口係可以買去市區既的士票,不過大家唔介意的話,可以出去出面接的士,係會平rm10架,又或者上樓上搭公巴到市區,價錢$2蚊一程,非常方便的,我們先回酒店放低行李及check in後,就直接去檳榔律搵好野食,因為個個都肚餓了

    愉園餐室,檳城有好多這類的餐室,其本上這店只提供飲品,但就可以在附近不同的食檔買入店裡食的

    愉園餐室在景貴街


    睇下裡面幾咁陳舊,很有懷舊氣氛的


    這檔係檳城認了第二冇人敢認第一的潮州煎蕊,又或者叫珍多冰

    炒飯檔


    炒粿條


    檳城亞參叻沙


    福建蝦麵


    豬腸粉


    亞參叻沙:雖然這檔不是最好味的,但為了滿足我的欲望,免為其難都要一試,試了第一啖後,覺得味道都幾複雜,帶點偏酸的,湯底唔算出色

    炒粿條:味道炒得好香好正,完全唔覺得鹹,很夠鑊氣,d蝦肉好鮮好彈性的

    福建蝦麵:湯底有蝦味,但未算好濃果種,但都已經很滿足

    豬腸粉:檳城的豬腸粉係會加入蝦膏醬的,蝦膏係偏甜帶鮮的,所以我通常都會叫減半份量,如果唔係會太濃味的,豬粉非常非常之滑啊,以後的幾日我都會經常點黎食的

    珍多冰:珍多裡面的材料有刨冰、珍多、紅腰豆、椰糖、椰漿,裡面的椰糖很香,綠豆粉又夠滑,加上咁熱既天氣食返碗,真係透心涼啊,再睇下個價錢真係唔敢相信,係rm1.6蚊碗

    柑桔冰


    竹蔗冰


    薏米水


    呢個職員真係識歎,一個人飲咁大杯菊花茶,認真誇張
    呢個職員真係識歎,一個人飲咁大杯菊花茶,認真誇張

    食飽飽後,我們第一站去馬來西亞最大的寺廟(極樂寺),這個寺廟歷史都幾巴閉的,每年都有很多善信黎參拜的,大約20-25分鐘車程就到達


    大殿裡面的雕刻同牆壁的畫像都很精細的


    估唔到這寺廟有好多學生黎旅遊的,但多數都唔係華人先搞笑


    跟住要搭個電車上去睇個觀音像


    左右有12生肖的石像


    這裡可以望到檳城市區的風景,景觀很開揚唔錯的


    這個觀音像係新落成很宏偉的

    這個係舊有的觀音像,因為之前一場意外而燒剩個頭部,所以現在安放在屋頂上

  • Fantasy 2010-9-30 01:00:02
    3#

    玩完返黎啦, 多謝分享呀, 支持!!!

  • Dusty 2010-9-30 10:19:44
    4#

    原帖由 Fantasy 於 2010-9-30 01:00 發表
    玩完返黎啦, 多謝分享呀, 支持!!!
    係啊,趕頭趕命咁完成了個行程,謝謝你的支持啊

  • Dusty 2010-9-30 16:33:02
    5#

    2010年檳城、浮羅交怡6日5夜歎美食之旅day1(PART2)

    我們睇完極樂寺後,就去了附近一間食亞參叻沙最出名的店,亦係我今個旅程最期待的一間食店,大家一定要認住係極樂寺山腳果間最為正宗.


    睇下煲湯底顏色幾咁靚


    點解檳城的叻沙有別於其它地方的?係因為其它地方通常係用混合椰汁、咖喱的,但檳城的就唔同,係用亞參+池魚熬製而成的香濃湯底,再加入蝦膏、薄荷葉、南薑花等等的配料,我在旁邊一路影相一路聞到d香味攻過黎,我都係返埋位食先喇


    睇下d池魚煲得幾碎,完全唔會食到魚骨的,味道酸酸、甜甜、辣辣、又刺激又開胃醒晨的


    這種麵係一定配亞參叻沙的,非常之滑,很好味的


    終於都歎完一碗超級美味的喇沙,就算現在出面落緊雨都影響唔到我的心情啊


    之後就在附近影影相,呢間係印度的寺廟



    現在睇到就知係幾咁宏偉的



    轉眼間我們坐了20-25分鐘的車程,去到一個很出名的印度小區,這裡可以買到印度正宗的日常用品及食物,這間就係小型的清真寺



    呢間印度廟在呢區係算最多遊客及善信黎的,但遊客都要專重裡面的佛像,不可以拍最正宗最有代表性的佛像,同埋要肅靜



    拜印度神用的花圈,很靚的



    拜印度神用的香,不過我聞唔慣陣味



    印度地道食品



    呢度其實分了三個區域,分別係印度人、華人、馬拉人,很多建築物及街道都保留得很好



    亦有很多會館及姓氏宗祠,原因係以前很多從鄉下黎到檳城,但又無親人投靠,所以很多時都會去呢類地方搵同鄉或同姓的人幫助



    大家可以坐呢些懷舊花車遊覽呢區的建築物,半小時大概rm20-30蚊,睇架車靚唔靚而定的



    亦有很多中國特式的寺廟



    跟住我們坐車大概10-15分鐘的車程,就去到檳榔嶼,呢個鐘就係呢度的地標



    點解呢度會咁多烏鴉架?其實係因為當時這區種了大量香料及咖啡,為了免受蟲入侵,所以當時英國政府就引入烏鴉去對付牠們,但英國政府撤走時,可惜冇把烏鴉一齊帶走



    呢度亦係防衛外敵在海上攻擊的一個重要陣地



    睇下d大炮幾咁有氣勢



    不過我們無入去參觀,因為無乜野睇的,但就可以接觸到炮台囉



    這座建築物特別多烏鴉聚集的



    又係好英式的建築物



    呢個石碑係紀念當時戰爭死去的軍人



    流動小販車



    睇下今日的天氣幾咁差,天陰陰,好彩未落雨



    [ 本帖最後由 Dusty 於 2010-10-1 13:16 編輯 ]

  • Dusty 2010-10-1 13:15:17
    6#

    2010年檳城、浮羅交怡6日5夜歎美食之旅day1(PART3)

    參觀完檳榔嶼一帶後,我們出發去新關仔角食少少地道美食醫下個肚先,大概10分鐘車程就到達,不過途中都有點塞車  


    呢個小販中心起碼有五十個檔口以上,不過有些檔賣的食物都係相同的


    呢檔係賣炸樂樂的,所謂的樂樂即係很多什錦食物,有個炸字即係把食物拿去炸,例如炸香腸、魚旦等等


    這檔都係叫叫樂樂,但就無炸字的,咁即係用灼的方法,類似打邊爐咁樣


    這檔賣燒海鮮的,價錢亦唔貴


    呢檔係賣蠔煎的


    外父最喜愛飲的羅漢果


    燒魷魚,行過都聞到好香


    這檔係賣牛、羊、雞肉串燒的,價錢還很平呢


    這檔係賣漢堡包的,賣相幾吸引的


    這檔係賣印度的食品

    我最喜愛的魷魚通菜啊


    這檔係賣豆腐花了豆漿的

    這檔係賣日本栗米的

    串燒:我們點了牛、羊、雞肉各兩串,個燒汁好好味,雞肉就很一般
    干撈雲吞麵:麵條就一般,不過味道就唔錯,雲吞的餡較粉

    魷魚通菜:個醬的味道酸酸辣辣,魷魚超好味


    燒池魚:池魚肉質轉粗,但魚味十足


    燒魔鬼魚:魔鬼魚係選擇較細條的黎燒,比kk用馬拉盞的更好味,肉質又嫩滑,特別係個醬很夾的


    羅漢果冰:羅漢果味唔算好重及唔太甜的

    試完新關仔角的地道小食後,我們成班為食團友終於要上正場喇,地點就在今晚入住的酒店附近,紐冷食街,呢道晚晚都很旺的,通常開到晚上12點至1點就開始收檔,檔檔都有自已的特色


    我們先在新映南茶室搵個位坐低先,然後再出去買野食


    這條街就在益香肉骨茶對面,唔難搵到的


    鴨肉粿條檔


    牛肉粿條檔
    燒雞翼檔


    煮海鮮檔


    睇下隻牛蛙幾巨型,大過我手掌啊


    還有很多店都無影到,因為要開餐唔得閒影


    怡保釀豆腐:主要係好多食物都有釀些魚肉在裡面,最正係豆腐,超滑
    牛肉粿條湯:個湯很重牛味,其實係牛什,乜都有些
    西刀魚丸:都有彈性的,唔錯


    亞參叻沙:今日已經食過三次了,最出名果間都試過,所以對這磅已經無感覺了,嘻嘻




    福建蝦麵:蝦味都幾濃,唔錯


    咖哩麵:咖哩又香又濃,正啊

    炒聖子:聖子味道很鮮,可以老闆炒得過熟了......


    叁巴馬來盞臭豆:我朋友的最愛,其實臭豆已經唔係容易食到的,味道帶苦,但對個腎非常有益,因為會幫助排毒的
    鹵肉:我覺得很普通


    雲吞撈麵:唔知點解馬拉人撈麵用既醬汁係特別好味的


    豬腸粥:無試到


    燒雞翼"味道就幾好,但肉質有點(鞋)

    釀雞翼


    薄餅:裡面個餡係沙葛

    檳城炒粿條:d蝦好大隻,芽菜又脹卜卜,炒得很香
    宮保炒牛蛙:雖然啖啖肉,但鮮味同肉質都唔夠田雞好

    雞蛋薄餅:味道似雞旦仔,但就煎得很薄


    蠔煎:其實係用雞蛋、蠔、薯粉黎炒的,所以食起黎幾煙韌,蠔仔又夠肥


    荳蔻冰:酸酸甜甜,我覺得幾好黎的


    凍龍眼湯:龍眼味十足,可惜甜過頭喇


    黎個大合照先,不過有些食物都未放在檯上


    [ 本帖最後由 Dusty 於 2010-10-3 20:44 編輯 ]

  • Dusty 2010-10-3 11:38:53
    7#

    2010年檳城、浮羅交怡、怡保6日5夜歎美食之旅(day2)巴雅島編

    今早6點45分就要起身及梳流,因為要8點前到碼頭搭船去巴雅島的,跟住出發去食個印度餐廳食薄餐


    這棟咁高的建築物就在我們酒店隔離,所以返酒店實唔會迷路的heehee


    建築物前面會放了一棵空心樹的藝術品,就在碼跟斜對面就會找到以下果間印度餐廳的

    店名叫斯里莫提餐廳


    門口兩邊分別都放香蕉樹,唔知有乜用途,但我諗要經常更換囉


    以上的食品一樣都無試到,亦唔知係乜?


    好濃的咖哩啊


    就係呢舊麵料整出美味的薄餐


    然後再整到一個波一個波咁樣的


    師父再用又拋又撻的鬼斧神功後


    原本由一粒波,再變成大大塊

    有團友要求加蛋喎,話會香d


    之後再包到四方型,煎多陣就食得,我都睇到流晒口水喇


    終於完成喇,賣相感覺唔錯


    我們唔客氣喇......好唔好食?唔話你們知.哈哈哈


    呢個有點帶甜的,咁道都可以,但太油膩了......


    呢個就係我的最愛,超級脆架


    凍拉茶:茶味唔夠濃及超甜......

    外父點的,賣相麻麻地


    就在餐廳隔離的店買的,麵包係幾厚的,但睇d牛油流晒出黎,好美味的


    椰漿飯:我無試到

    食飽飽後就去碼頭準備上船,檳城去浮羅交怡每日得一班船來往的,所以最好提早買定票就穩陣些,我們買了package係包巴雅島及浮羅交怡的船票,價錢係RM$310一個人,呢個係公價,提醒大家唔好買較平的package,因為平價的package在巴雅島落點不會在大浮台的,只能停在睇鯊魚那邊的.



    我去旅行真係慘過返工啊,唔洗用得我咁盡姐......


    我們就係坐呢架船去巴雅島的


    大家記得唔好除掉呢條手帶,因為在巴雅島上船去浮羅交怡係認帶唔認人的

    船倉裡面,有幾台細電視播電影的,不過唔睇好過


    我們出發喇

    開船後就可以走出船外面睇風景及影相的
    唔知點解檳城及浮羅交怡係特別多包晒全身的旅客,好奇怪

    大概2個多小時的船程就到達了巴雅島,隻船係停泊在一個大浮台上,我們一落船後就要職呢位職員講解一下注意事項


    浮台影出去的環境


    亦可以落浮台底部參觀海底世界的,雖然唔算好大地方,但勝在係免費的


    幾多魚魚,不過水質就一般般



    [ 本帖最後由 Dusty 於 2010-10-5 09:48 編輯 ]

  • Dusty 2010-10-3 20:09:36
    8#

    2010年檳城、浮羅交怡、怡保6日5夜歎美食之旅(day2)巴雅島編2

    講解完後我首先去報名體驗潛水,價錢係RM$140一次,時間大約20分鐘多些,有潛水牌者就平一半,潛點亦唔一樣的,體驗潛水的教練亦係一對一的,講解係用廣東話及非常清楚同易明


    我們下潛點其實就在浮台下面,終於可以下水喇,心情好興奮啊


    這潛點附近有很多大石班


    好得意的小丑魚,不過個教練用手指不停打擾條小丑魚,好反應這行為

    當我影緊石班時,教練突然叫我轉身,我轉身後即刻心跳加速,因為條海狼就在我眼前,係非常非常之近距離的,牠同我一樣定住了唔郁,隻眼望住我部相機,我心想會否個潛水殼反光而吸引它呢?教練就叫我唔好郁及收埋對手放在心口,隔了一陣牠就游走了,真係嚇死啊......


    睇下d牙齒幾尖,俾牠咬一啖實大獲,不過後尾聽朋友講,海狼好少會攻擊體積比自已大的獵物

  • Dusty 2010-10-3 20:10:05
    9#

    2010年檳城、浮羅交怡、怡保6日5夜歎美食之旅(day2)巴雅島編2


    教練話影張海底照喎嘻嘻


    周志輝的潛水姿態真係好專業及有美感啊!
    好大堆魚群啊,之後就上返浮台

    [ 本帖最後由 Dusty 於 2010-10-3 20:58 編輯 ]

  • Fantasy 2010-10-3 23:21:18
    10#

    d野食好正咁喎.. 我都冇去過檳城, 唔知幾時先有做澳門去檳城的promo呢!!

    你影d潛水相好靚呀, 多謝分享!!

    想問你係檳城 > 巴雅島 > 浮羅交怡係咪同一隻船架? 咩價錢呢? 係巴雅島停幾耐??

    Thx..

  • Dusty 2010-10-4 16:36:50
    11#

    原帖由 Fantasy 於 2010-10-3 23:21 發表
    d野食好正咁喎.. 我都冇去過檳城, 唔知幾時先有做澳門去檳城的promo呢!!

    你影d潛水相好靚呀, 多謝分享!!

    想問你係檳城 > 巴雅島 > 浮羅交怡係咪同一隻船架? 咩價錢呢? 係巴雅島停幾耐??

    Thx.. ...
    我們買了package係包巴雅島及浮羅交怡的船票,價錢係$310一個人,呢個係公價,提醒大家唔好買較平的package,因為平價的package在巴雅島落點不會在大浮台的,只能停在睇鯊魚那邊的.另外玩到下午三點半就會開船到浮羅交怡,好似係同一隻船的。

  • Dusty 2010-10-4 17:05:34
    12#

    巴雅島浮潛編

    潛完水後,就要陪老婆去浮潛,因為她在等緊我


    先影張勝利手勢照先


    呢個島的魚簡直多得誇張,係好誇張果種


    我未試過被咁多魚團過的,搞到老婆都好驚,d魚認樽唔認人的,超級瘋狂咁追住咬個樽,也手都唔放過,所以浮潛喂魚的話,最好著長衫及戴手套
    老婆頂唔住,要抖下喎


    睇相都知d魚有幾恐怖,好似食人倉咁,重要有很多都好大條的
    我們玩到12點半就去沖身,因為夠鐘食午飯喇


    食物選擇都算ok,雖然質素一般,但已經比想象中好,特別係西瓜最好味,又甜又多汁


  • Fantasy 2010-10-5 00:36:01
    13#

    咁快就有新野睇, 太好啦, 請問$310係咩幣呀?? 個package係咪指單程船, 停巴雅島玩, 包食, 跟住到langkawi 碼頭各自散咁呀

    D野食真係比想像中好咁啦..

  • Dusty 2010-10-5 10:10:19
    14#

    原帖由 Fantasy 於 2010-10-5 00:36 發表

    咁快就有新野睇, 太好啦, 請問$310係咩幣呀??<------唔好意思,打少了RM(馬幣)計的, 個package係咪指單程船, 停巴雅島玩, 包食, 跟住到langkawi 碼頭各自散咁呀<------無錯,就係這樣的。

    D野食真係比想像中好咁啦..<------簡直超出預期啊

  • Dusty 2010-10-5 18:16:20
    15#

    與鯊同游編

    午餐過後,我們又要爭取時間去浮潛喇,今次將會更刺激更興奮,老婆的心情就非常擔心及害怕,都正常既,始終係女性嘛hahahaaaa,我們搭大概2分鐘的船去另一個灘的碼頭


    呢個灘既魚一樣咁多,一見到有食物就爭住搶食,非常瘋狂

    再行前些竟然見到好大條的鯊魚啊,其實之前都知有呢個行程的,所以有晒心理準備,但去到現場個感覺就唔同晒,因為唔知個數量係咁多的,同埋可以落水同牠們一齊游水及好近的接觸


    都唔知點解呢個島的d魚會咁誇張的,我都唔想再提,但實在太......


    其實我發覺一樣野,就係當有人喂魚時,d魚群搶食時係會引起鯊魚的注意的,然後就會游近魚群的,唔知係咪想攻擊d魚呢?


    係咪好多鯊魚呢?我都要飛奔落去喇


    真係唔講得笑,好近距離的

    老婆繼續喂魚


    但魚群實在太多了,搞到老婆都有點怕,最慘係會咬手指的


    唔好意思,醜態被朋友影到添,因為個樽的麵包已喂晒,所以要倉啊!哈哈哈


    黎返張正常既先


    大概玩到2點幾,我們就回個大浮台沖身,因為3點鐘隻船就會準時出發去浮羅交怡的


    睇下被魚咬到的傷口幾深,所以浮潛喂魚前最好帶手套


    [ 本帖最後由 Dusty 於 2010-10-5 19:23 編輯 ]

您需要登錄後才可以回帖 登錄 | 註冊

重要聲明:本網站討論區內容是以即時上載留言的方式運作,澳門流動社區對所有留言的真實性、完整性及立場等,不負任何法律責任。一切留言之言論只代表留言者個人意見,並非本網站之立場,用戶不應信賴內容,應自行判斷內容之真實性。由於本討論區受到「即時上載留言」運作方式所規限,故不能完全監察所有留言,若讀者發現有留言出現問題,請聯絡我們。澳門流動社區有權刪除任何留言及拒絕任何人士上載留言,同時亦有不刪除留言的權利。並遵守特區政府個人資料保護辦公室所公佈的「在互聯網上發佈個人資料的注意事項」.切勿撰寫粗言穢語、誹謗、渲染色情暴力或人身攻擊的內容,敬請自律。

小黑屋| Archiver| 澳門流動社區 CyberCTM.com

Powered by Discuz! © 2001-2013 Comsenz Inc.