我的收藏
版主
申請
開區
申請

[遊記] 2010年檳城、浮羅交怡、怡保6日5夜歎美食之旅(超多相全卷完)

  • Fantasy 2010-10-6 14:47:41
    16#

    唔錯, 唔知DUSTY兄下次有咩計劃呢!!

    泰南附近有幾個小島都好似幾正, 其中一個叫 Koh Lipe 係浮羅交怡有得坐船去, 我諗都好岩你去呀!!

  • fxck 2010-10-6 17:04:19
    17#

    我月尾會去檳城同浮羅交怡
    睇到你d 相都好吸引
    希望去到都係咁

  • Dusty 2010-10-6 19:22:04
    18#

    原帖由 Fantasy 於 2010-10-6 14:47 發表
    唔錯, 唔知DUSTY兄下次有咩計劃呢!!

    泰南附近有幾個小島都好似幾正, 其中一個叫 Koh Lipe 係浮羅交怡有得坐船去, 我諗都好岩你去呀!!
    我打算1月去沙巴考兩個潛水牌,然後5月再闖詩巴丹及住Kapalai Island。

  • Dusty 2010-10-6 19:22:47
    19#

    原帖由 fxck 於 2010-10-6 17:04 發表
    我月尾會去檳城同浮羅交怡
    睇到你d 相都好吸引
    希望去到都係咁
    你們一定都會玩得好開心的

  • Dusty 2010-10-6 23:25:51
    20#

    2010年檳城、浮羅交怡、怡保6日5夜歎美食之旅(day2)浮羅交怡

    我們大概坐了1個小時的船程,就開始到達浮羅交怡,首先會見到d小島


    話咁快就到達碼頭喇


    如果要用車仔的話,係要俾RM$1蚊的


    呢架就係我們租的車喇,係韓國牌子黎架heehee


    呢間雪糕店就在碼頭入口,在馬來西亞係好出名的

    呢間雪糕店係有好多不同的選擇,但價錢都唔平的


    最受歡迎的就係呢款咖啡杏仁味,裡面有一粒粒杏人,咖啡很香濃,好好味架


    睇下老婆個樣就知啦hahahaaa
    之後我們先出發去首相博物館先的,因為5點半就關門的,我之後會登出首相博物館特集的

    碼頭隔離就係傳說公國及最出名的老鷹廣場,我們見到有人在玩私人直升機,不段飛黎飛去好鬼嘈啊......


    例牌都要黎這個地標影返十幾張相先夠既


    我外父都影左幾十張相啊


    黃昏時間的日落


    呢個就係傳說公園


    之後我們就去了美香大飯店食晚餐,不過離市中心有30分鐘的車程架


    唔係掛?咁遠黎到要我食冰鮮既海鮮?我們當然要食游水架啦,跟住問問老闆有否游水的啊?原來游水海鮮收埋在房裡面,都唔明點解?


    好可愛的琵琶蝦

    紅樹林蟹,好凶猛的

    游水班

    大大隻的瀨尿蝦
    我們呢餐點了咸菜豆腐湯、紅燒雞翼、炒粿條、炒米粉、椒鹽瀨尿蝦X4、酒蒸瀨尿蝦X4、黑椒琵琶蝦、薑蔥炒蟹X4、清蒸石班、清炒通菜、薑蔥炒蛤蜊、宮保炒螺、飲品,埋單RM$810蚊,原價RM900蚊的,因導遊識得個廚師,所以有9折heehee

    炒米粉:炒得比較油左d,一般

    炒粿條:反而呢碟都係油,但炒得幾香,唔錯

    紅燒釀雞翼:雞翼裡面再釀雞肉,但點解要用雞肉呢?

    咸菜豆腐湯:埋相唔錯

    豆腐超滑,但咸菜的味道很淡

    魚旦食落唔新鮮......


    酒蒸瀨尿蝦:個盤底係有火黎暖住d瀨尿蝦架

    瀨尿蝦既肉質好甜,蒸得剛剛好,酒既香味同d蝦好夾,美味啊

    薑蔥炒蛤蜊:蛤蜊輕輕炒得熟左少少,但可接受

    椒鹽瀨尿蝦:當然唔好期望同香港比,椒鹽唔香的

    好彩揀到隻有膏的俾我食,咁都無咁嬲

    宮保炒螺:d螺有d腥味既......

    清蒸石班:一食就知係養班,d肉質無彈性,不過現在好多地方都係賣養的

    黑椒琵琶蝦:其實我唔喜歡用黑椒炒,因為味道太濃了,蓋晒d蝦味

    啖啖肉有彈性,唔錯


    薑蔥炒蟹

    d蟹都幾大隻架,d肉好實


    個鎚仔到底要黎打蝦殼定蟹殼呢?


    在幾十隻蟹裡面,好辛苦先揀到隻膏蟹,點知無人識欣賞......


    清炒通菜:一般般

    椰青:椰青夠晒凍及清甜

    洛神花茶:無試


    桔仔冰:無試

    單據


  • Fantasy 2010-10-7 09:40:43
    21#

    原帖由 Dusty 於 2010-10-6 19:22 發表
    我打算1月去沙巴考兩個潛水牌,然後5月再闖詩巴丹及住Kapalai Island。


    沙巴考潛水牌咩價錢呀? 係邊到學架?

  • Dusty 2010-10-7 19:43:57
    22#

    原帖由 Fantasy 於 2010-10-7 09:40 發表


    沙巴考潛水牌咩價錢呀? 係邊到學架?
    新價未出,但舊價係rm850一個牌,應該在島上考的。

  • Fantasy 2010-10-8 09:27:26
    23#

    回覆 #22 Dusty 的帖子

    係咪全包架? 連唔連埋教材之類個D呀, 講咩話? 邊個島? 島上住宿咩價錢?

  • Dusty 2010-10-8 19:21:03
    24#

    原帖由 Fantasy 於 2010-10-8 09:27 發表
    係咪全包架? 連唔連埋教材之類個D呀, 講咩話? 邊個島? 島上住宿咩價錢?
    全包的,但唔包住宿,未問實邊個島考及潛水,因為等緊個價錢,講華語的

  • Dusty 2010-10-8 19:57:02
    25#

    我們一到浮羅交怡後,就即刻出發去首相博物館,呢位首相係馬來西亞做得最長的一位,裡面收藏很多由世界各地送贈的禮物

  • Fantasy 2010-10-10 20:21:10
    26#

    你好似樣樣野都影晒咁制, 咁咪要好多時間...

  • Dusty 2010-10-10 23:04:57
    27#

    原帖由 Fantasy 於 2010-10-10 20:21 發表
    你好似樣樣野都影晒咁制, 咁咪要好多時間...
    你錯了,裡面還有好多我都無影到,實在太多了

  • Dusty 2010-10-12 23:46:41
    28#

    今早8點幾就起身及食過早餐後,大概9點半就出發去幾個景點遊玩,我們在島上租了船玩半日


    呢架就係島上租既船,好似好舊的款式


    出發喇,好彩陽光普照


    原來我們隻船都唔算舊哈哈哈


    浮羅交怡總共有百幾個大大小小的島嶼,但潮退就好似得99個


    我們首站係魚排,入場費係rm5蚊包一小樽魚料


    雖然可以同隻海龜影相,但其實覺得牠們很慘......


    這條虎鯊係好細條開始養起,但現在越黎越大,但地方就好細......


    黑王魚,係一種大魚,搶食物時係會好瘋狂的


    參觀完魚排後,就出發去第二個景點,就係孕婦島


    大家覺得似個孕婦躺在海上嗎?


    大概15分鐘的船程終於都到達了孕婦島


    一上島就見到呢隻猴子好像在沉思


    可能知道我在偷拍牠


    島上有好多猴子,大家要小心財物及唔好露出食物及汽水樽


    霸王硬上弓,隻猴子要強黎......


    紅樹林的地方,大多數都有彈塗魚的


    這條路最多猴子搶野的


    牠成功了


    呢隻猴子個樣好似生意失敗,好搞笑


    島上的地圖


    如果要經過呢條路,可能要俾過路費先可通過


    小心吸血蟲


    淡水湖水上活動費用表


    大概行十分鐘就到達呢個淡水湖


    你們知唔知牠們在做乜?到底有乜野吸引牠們呢?




    這個淡水湖都幾大,特別之處係在山中間,但座山又被海圍住的


    島上的傳說係講,以前有個公主結婚後一直都冇懷孕,有日黎這裡飲了一啖水後,不久就懷孕了,大家聽過就算






    這蘑菇係假架


    大概遊覽大半小時就離開了,要出發去第三個景點,就係紅樹林


    這個島似唔似隻龜呢?


    大概15-20分鐘的船程就到達紅樹林,呢度有好多鷹,因為呢度有喂鷹表演的


    每隻船只能投一次食物在水上,但估唔到係會用雞皮黎喂囉


    睇完喂鷹就去睇下紅樹林


    突然見到條四腳爬爬在海上游水,不過唔算大隻


    大家知唔知呢枝野係乜東東呢?


    原來係紅樹的種子,種子成熟後就會等潮退的時候,就會打直咁插在泥濘上,老婆話要親手種一棵喎

    根住我們就去最後一個景點,就係釣魚喇


    老婆問我呢個地點釣魚好唔好?我一睇就知Good啦


    睇下幾快就有條東星班上釣,不過就好細條囉


    我們既導遊就厲害喇,釣到條倉魚,不過大多數係魚排偷走出黎的,因為聽他話,呢個水域較少釣到倉魚的


    老婆都釣到啊


    船夫真係更強,放條線落底唔夠3秒就釣到咁大條石班,我們的午餐有著落喇hahahaaa


    之後都約到很多,但細條的魚我們會即時放生的,玩了大概一小時就回酒店沖涼喇


  • Dusty 2010-10-14 23:23:54
    29#

    2010年檳城、浮羅交怡、怡保6日5夜歎美食之旅day3PART2

    玩了成個上午,我地個個都好肚餓了,我們午餐決定去食泰國野,這間暹羅村餐廳就在水族館隔離


    睇落這間店都有做團的,裡面地方很大


    原來食神都有黎過做生招牌喎


    以上係餐牌,價錢唔算很貴,我們還把早上釣到的魚交給老板娘處理,根住再點了冬陰明蝦湯、咸菜東星班湯、三味醬明蝦、乳鴿、金黃炸春卷、咸魚炒芥蘭、泰式芒果沙律、泰式鳳爪沙律、紅咖哩牛肉、泰式青咖哩、泰式醬炒花枝、酸柑蒸石班、酸柑蒸倉魚、蟹肉蝦仁炒飯、黃梨炒飯,埋單RM$388蚊.


    椰青:呢個椰青非常之凍,好正啊


    紅咖哩牛肉:咖哩都幾香,唔多覺有辣味

    要黎撈飯一流


    泰式芒果沙律:青芒好香,這個沙律非常好味,味道很凸出

    泰式青咖哩:青咖哩就刺激得多,但越食越想食

    泰式鳳爪沙律:鳳爪切得太細了,影響口感,但味道真係好得好好,個個團友都話做得好正宗
    黃梨炒飯:味道一般,炒得嘛嘛

    泰式醬炒花枝:花枝食得出很新鮮,肉質幼嫩,師父炒功有水準

    酸柑蒸石班:野生魚同養魚分別真大,肉質有彈性,又有魚味

    睇下幾咁雪白


    酸柑蒸倉魚:魚肉有點粗(鞋),麻麻地

    蟹肉蝦仁炒飯:材料就多,但個飯炒得唔香既......

    三味醬明蝦

    冬陰明蝦湯:我平時都唔會點冬陰公湯的,因為唔鐘意果陣味,但這間店令我對冬陰公湯有點改觀,這鍋陰公的味道越級濃,比香港飲的濃很多倍,酸及辣配合得很好

    大家如果黎這店幫襯的話,記得要試


    乳鴿

    金黃炸春卷:春卷炸很很脆,非常香口

    咸魚炒芥蘭:初初我以為唔多好味的,但味道好香好香,果些咸魚唔同平常的味道架

    咸菜東星班湯:唔知點解明明係點咸菜湯,但味道就極重蕃茄味,蓋過晒所有材料的味道
    好彩野生東星班的肉質係好嫩滑的


    老婆食得真乾淨哈哈哈


    食飽後就出發去水族館,請留意水族館特集
    睇完水族館後就出發去山頂

    點知去到某個高度時,d霧氣已經蓋住整個山頂,心感不妙


    白蒙蒙一片,乜都睇唔到啊,回水啊


    平時係睇到這個景架


    玩了一陣就急急腳走了,我們先去返碼頭,因為團友話想食雪糕


    老婆點了芝士草莓雪糕


    我當然選擇最愛的朱古力雪糕啦,味道很濃郁的
    之後出發到水族館附近行街,因為浮買交怡最旺就係在這裡,食、買、spa都在這裡找得到


    行完街就出動去食晚飯,我們選擇黎燈籠海鮮館


    門口唔洗掛咁大個燈籠姐......


    不過裡面的環境就唔錯


    超巨型的虎蝦
    我們點了招牌豆腐、招牌鴨、芙蓉蛋、紅燒雜菜、麥皮海蝦、蜜汁雞翼、蟹肉蒸元貝、鐵板鹿肉、咸菜豆腐湯,埋單RM$271.5.


    桔仔冰,桔仔唔同KK的,似過年果些桔的味道


    招牌豆腐:估唔到可以食到呢個豆腐,我本身都好喜歡食豆腐的,呢個豆腐用炸蒜、蝦米仔黎煮的

    豆腐又滑又有豆香,加上d醬汁黎撈飯,真係可以食多幾碗架


    招牌鴨:無試,但他們話好味

    紅燒雜菜:一般般

    芙蓉蛋:都唔明點解會點黎食?但又煎得幾香既......

    咸菜豆腐湯:浮羅交怡的咸菜豆腐湯都係無乜咸菜味的

    鐵板鹿肉:肉質似牛肉,但就好嫩滑,加上d醬好野味的

    蜜汁雞翼:無乜特別

    蟹肉蒸元貝:元貝竟然用蟹肉蒸,真係有些怪怪地,但竟然無乜人食,差唔多我食晒

    麥皮海蝦:味道甜甜地的,古古怪怪,不過都算好味既

    食飽飽後就回酒店休息

  • diydiy 2010-10-16 01:15:21
    30#

    哇!不得不讚下你的相, 好靚, 好正!

    你部相機仲正, 點檥可以係水中影魚仔?

您需要登錄後才可以回帖 登錄 | 註冊

重要聲明:本網站討論區內容是以即時上載留言的方式運作,澳門流動社區對所有留言的真實性、完整性及立場等,不負任何法律責任。一切留言之言論只代表留言者個人意見,並非本網站之立場,用戶不應信賴內容,應自行判斷內容之真實性。由於本討論區受到「即時上載留言」運作方式所規限,故不能完全監察所有留言,若讀者發現有留言出現問題,請聯絡我們。澳門流動社區有權刪除任何留言及拒絕任何人士上載留言,同時亦有不刪除留言的權利。並遵守特區政府個人資料保護辦公室所公佈的「在互聯網上發佈個人資料的注意事項」.切勿撰寫粗言穢語、誹謗、渲染色情暴力或人身攻擊的內容,敬請自律。

小黑屋| Archiver| 澳門流動社區 CyberCTM.com

Powered by Discuz! © 2001-2013 Comsenz Inc.